《別離》
人生，上半部份係加法，每日你都會覺得自己擁有多咗，身體體質、知識智慧、金錢物質、朋友伴侶等等。
我地由一無所有，到擁有愈來愈多，嘗試去擁有更多更好，直到……
人生下半部，減法的開始，擁有嘅野，你會一一失去，直到再次一無所有，離開呢個世界。
同細佬講咗佢嘅情況，無論幾多歲都好幾多人生經驗都好，人都好避免提及死亡，我爸、我媽甚至我都係，一直都迴避去提及，但最後都係覺得，佢都有知情權，知道自己人生仲有幾耐時間，會唔會係最後一段路圓未圓的夢。
「如果有日你要離開我哋，你會點？」我媽咁同細佬講。
佢唔係好大反應，應該話佢最近都好靜，唔係點出聲，但佢聽完，講咗句令我喊咗幾晚嘅說話……
「真係要離開，咁都要離開嫁喇……」
係，當你用盡一切方法去拉住都捉唔到，你都要接受佢離開。
或者成熟，就係開始接受一些不可避免的離開，直到最後你自己離開為止。
我有養貓同狗，有同朋友講起，佢哋唔敢養，因為寵物一去彩虹橋，真係令自己好難受……唔想再痛多一次……
係，所有分離，所有失去，都會令人痛苦，但亦因為你愛，先會咁痛苦；因為有回憶，先會咁痛苦。
有好多事失去時你覺得無所謂，咁係好定壞？可能因為對於呢件事可有可無。
下半世，我哋面對失去，好似父母離去，好似事業離去，好似伴侶離去，韓劇之中嘅生離死別，只係因為佢年輕化，但對於下半生嘅你我，呢種韓劇一點都唔狗血，反而係你我司空見慣。
別離，很痛，但呢一生大家有緣成為親人好友，已經係一場福份，離別之際，回憶大家一起嘅日子，陪伴佢走完最後一段路，鄭重地揮揮手道別。
他，只是先走一步，我們活下去，更要珍惜和堅強，讓他走得安心。
有緣再做一家人。
Search